MCGN is a non-profit, non-denominational Christian organization promoting spiritual renewal and economic development of the people in Mizoram and the surrounding region by serving them as Jesus did. (Mt. 20:28)

"Buh seng tur a tam hle si a, nimahsela, a thawktute an tlem; chutichuan, a buh seng tura thawktu turte tir turin buh Neitupa henah chuan ngen rawh u" (Mt. 9:37-38.)

HRIATTIRNA----Article ziak duh tan, phek khat aia seilo leh edit sa, a hnuaia email-ah thawn theih a ni; hming leh address dik tak nen.

MCGN tan hma:
Liana leh Ngeni Mualchin hi MCGN intan hma pawhin rawngbawlna-ah an in hmang a. Mizoram chhim lam kohhrante mamawhna an hmuhin, an theih angin an pui thin. Pastor Bible zir te an chawmin, Kohhran tan lehkhabute an thawn thin. Vawikhat chu kohhran-in lehkhabu chhutna (printing press) an mamawh thu an hrilhin, an pawisa neih zawng zawng a lei nan an thawn. Liana Simpson Graduate School-a a kal laiin, Mizoram a vei thute an pawlah a sawi a. A thiante leh hotute chuan thil lian a nih vangin, Mizo dangte leh thiante nen tangtlanga ti turin an fuih a. An fuihna angin MCGN an tan ta a ni.

A tirah chuan duhthawhna vangin thil tamtak tih kan tum a. Kum 8 chhung khan zawi zawiin kan kal dan turte Pathianin min tihfiah sak zel a ni. Rawngbawlna hi damchhung tan a ni. MCGN thiltih tlangpui, a nih ang angin, a tha lam emaw a chhe lam emaw, a tawi zawngin:

• Mizoram Video - Mizoram chanchin Video-a siam turin Liana'n hun leh sum sengin sap 2 Mizoramah a hruai a: US tlangval 1997-ah leh Canada mi 1999-ah. Zoram mite pawhin an tanpui nasa hle, mahse sap 2 te hian an tiam angin an ti lo.
• MCGN Website - Pu Jeff Mead-a'n MCGN website 1999 khan a thlawnin min siam sak a, Pathianin mal a sawm a. Mi tam zawkin min lo hria-in Mizo hmun hrang hrang a mite pawh kan lo in hre thei ta. Kum 5 dawn lai chu Jeff-a min siam sak angin kan la hmang reng a nih hi.
• Mizoram Research - 1999 khan Liana'n USA leh CANADA Research Team, Mizoram chanchin zir turin a hruai a. Mizoram sorkar hruaitute pawhin nasatakin an puihin, bul thatak tan a ni. Hruaitu thenkhatte duhamna vangin hma a sawn thei lo a pawi hle. Mahni hlawkna zawng hmasa lova tantlan chu nise a hlawhtling tur. Tun thlengin, mi pahnihkhat chuan an tih zui.
• Pipu Uaina - Dr. Mary Beth Haines, research team zinga mi tlawmngaihna-in naupang pipu uaina (swingsets) pali, Durtlang Orphanage, Aizawl Sikul, leh Bualpui (Ng) khua tan 1999-ah pek a ni. A dawngtute'n an lawmin an tangkaipui hle. A tangkaina hi khawtlang hruaitu leh mi thahnemngaite'n an hmuh a, khaw hrang hrangah an tih zui kan beisei a ni.
• Scholarships - Juliet Florio Scholarship MCGN in 2000 atangin kan siam a. Zoram chhim lam High school engemaw zat-a an final year zirlaite hnenah kum 2 pek a ni tawh a. Kum 3-na atan dawngtu thlan fel a ni.
• Mizoram Chanchin leh Milem Bu - Mizoram chanchin ziakna lehkhabu atan, lemziak turin Dilip Bhattacharya, Kolkata 2000-ah kan sponsor a. Thawktu in daihlohna vangin lehkhabu kan siam thei rih lo.
• Mizo Leadership Training - 2000-2001-ah Mizo Leadership Training USA-ah neih a ni a. Mi 7-10 lokal turin kan hrilh a, mi 5 chauh MCGN-Mizoram hotute'n an thlang a. Hei hi Liberty Christian Center, Fairfield, California mission pastor, Pu Bruce Moore a tanpuina vang a ni. Beisei anga thil a kal loh vangin MCGN-International Board chuan a chhunzawm ta lo.
• Mizoram Chhimlam Rawngbawlna Zin - 2002-ah Mission trip khatna, Mizoram chhimlamah Rev. Robert (Bob) Harrison-a, Lianate nupa leh an fanu, Lisa-i an kal a. Lawngtlai leh Saiha-ah rawngbawlna an nei. Tum hnihna chu 2003-ah Bob-a leh Dr. Neil Foster leh a nupui Marilynne te'n an va tlawh nawn leh a; Dr. P. C. Biaksiama'n Aizawl atangin a hruai a. Dr. Foster-a hian Aizawl-ah Leadership Training ti turin Zorama kal leh a duh a, mahse lo buatsaihtu an awm lo. Tum thumna chu 2004-ah Liana & Ngeni Mualchin an kal leh a. Rawngbawlpui (partnership) tur kan ngaihtuah.
• Mizo Electronic Bible - 2000-a Mizo Bible computer-a dah kan ngaihtuah lai leh volunteer-a tih kan tum laiin, Pu Robert Wood-a'n Mizo tawngin Johana bu electronic version min rawn thawn a, a chungah kan lawm hle. Tunah Mizo electronic-Bible kan chhu vek tawh a, website-a dah tur leh cd-a siam turin peih tep a ni. MCGN-Mizoram hotu hmasa te'n kan tihloh danin hma an lak vangin pawisa pawh kan seng tam a. Bible hman tangkai lehzual beisei vanga ti kan ni.
• Lehkhabu Chhuah - Missionary Irene Wesbster-Smith chanchin “Sensei” chu Mizo tawngin Pi Nongheli (Novi) leh a pasal Pu Kharmawia (Mawia) te'n min lehlin sak a; 2002 khan chhuah a ni. Mizoram lehkhabu lehlin tha zingah 2003 khan thlan a ni. Lehkhabu tangkai dang lehlin zel kan tum.
• Article Ziak - Article ziak turin sawmna kan hmu thin, mahse kan ziak vek thei lo. Kan vei zawng articles kan ziak bawk a. Liana articles kan khawnkhawm theih chin chu a buin M.C.Awia'n 2003-ah a chhuah a. Mizoram lehkhabu tha zingah 2004-ah thlan a ni.
• Jail-a Bible Sem - Jail rawngbawl nan, 2003 atangin Mizoram tangte hnenah Bible kan sem a. USA-a kan kohhran leh Kristian thiante'n min tanpui a, chhunzawm zel kan tum. Burma leh Bangladesh ah pawh tih kan duh.
• Thailand leh India Rawngbawlna Zin - 2004 January leh February khan Liana leh Ngeni chu mission trip in Thailand leh India ram an tlawh a. Burma ram erawh chu harsatna vangin an tlawh thei ta lo. Burma leh Bangladesh ram chhunga rawngbawlna kan ngai pawimawh a, kawng inhawn hun kan nghak reng.
• Newsletter - Thlatin chanchin (MCGN Newsletter) kum 5 lai kan chhuah tawh a. MCGN puitute Saptawng hmang an nih vangin English in kan ti thin a. Tun thla (June 2004) atangin Mizo section kan ti tan. Ziak duhte tan kan hawng a; hming dik tak leh address nen, phek chanve vel in thehluh theih a ni. Kan in daih loh vangin endik ngailo chhuahnghal theih nise.
• Creation Science - Creation Science Mizoram Sikul zirlai bu-a tel ve tura buatsaih nan, Dr. P.C. Biaksiama hnenah USA-a Christian school zirlai bu, Pi Ruth Willson-i min pek kan thawn a. Tin, Institute for Creation Research, USA-ah Pu Biaksiama lokal turin hma kan la a, mahse a la rem rih lo.
• Tanpuina pek -
  1. Thutak Nunpui Tu (TNT) te thawmhnaw sukna leh tihrona khawl leina. A lian zawk an mamawh.
  2. Burma rama High School sakna.
  3. Mizoram leh Nepala an hman tur "Transformation" leh "Mizoram" Videos.
  4. Burma rama-a thingtlang khaw kang insak nan.
  5. Burma Peace Conference mamawh atan, Dr. Laithuama hnenah.
  6. Burma hmeichhe tleirawl bomb vanga ke hloh tan tih chu Aizawl-a mawhphurhtute'n an va hmuh theih loh vangin pek lohin a awm - pawi kan ti hle.

---

THILTIH DUHTE

• Christian Foundation Institute din kan duh a. Mahse thil man tam leh lian a nih vangin tunah chuan kan thei lova. Kan duhna leh tumna, rilruah a awm reng a. USA thiante pawhin tha an ti a, remchan hun kan nghak a ni.
• Bangladesh, India leh Burma-a rawngbawltute tanpui na, USA-a kan kohhran atangin tul tihna a awm a, ngaihtuah mek a ni.
• Radio station, Zoram tawng hrang hrang leh thenawm (Bangladesh leh Burma) mite tawnga zirtirna tha leh chanchin tha puan nan tha kan ti a. USA-a thiante'n min tuipui a, tihngei tumna rilru neiin, ngaihtuah mek a ni. Mizoram atanga station neitu leh thawktu kan mamawh hmasa ber a, remchang kan nghak.

---

KAWNG INHAWNG KALTLANG LOTE

• MCGN intan hma, 1992-ah Hydro-electricity Mizorama promote turin kan kal a. 1993-ah Pu Ron Sommer-a USAID hotu pakhat, kan khua (Placerville, California) engineer hnen atanga kan hriat a ni. Pu Sommer-a hnen atanga tanpuina hmuh theih tur chu Mizoram sorkar hotute'n an bawhzui loh vangin a thi a. Tun thlengin power in daih loh vangin Zoramin a tuar a pawi hle.
• MCGN din hnu lawkah chanchinbu leh lehkhabu chhuah (publishing) kan lo ngaihtuah fo chu, David Thangliana hnen atangin tihpui sawmna kan hmu thut a. Mi rinawm leh thiama a insawi chu ringin, lehkhabu chhutna (color offset printer) thar leh a lian chi, a duh ang lei nan 1999-ah $20,000 kan thawh a. Reilo te hnuah David Thangliana chuan a tiam ang a tih loh vangin kan inseng thlawn ta a ni. Hei vang hian midang thil tihpui pawh min tim tir, a pawi hle.
• 1996-1997 a Liana Visiting Professor a Japan ram a awm laiin, company lian (Santori) hotu a hmu a. Mizoram atanga Sapthei tui leh Sawhthing an lei duh Liana'n Mizoram mite 1997-ah a hrilh a. Mahse tihchhinna (sample) an duh zat pawh Zoramin a thawn chhuak thei lo a, kawng inhawng a bo ta. Tin, telhawng (Konya-ku) pawh Zorama an chin chuan tam tak leisak an duh a, mahse ti tak taktu an awm lo, a pawi hle.
• Hydro-power siamna, penstock tha chi millionaire-in 1998-a min pek a duh chu, dawng tura um zui turin MCGN-Zoram hotute'n an ti thei lova. Hei hi World Vision te'n min sawisak vang a kan hmuh a ni a, a tawp ta mai, a uiawm hle.
• MCGN-Mizoram hotu hmasate dilna angin thlatin magazine chhuah tanna tura Rs. 45,000 vel November 1999-a kan pek chu magazine chhuah lovin a ral vek.

Pu Ron Sommer leh Santori hotupa chuan Liana hnenah, “In mite ramdang nena business ti turin an la in peih lo a ni,” an ti. Sawi tur a vang hle! Tun hnuah tiduh tak tak an awm beisei ila.

---

---IDEAS, ADVICE, AND COMMENTS ARE ALWAYS WELCOME---

---

MCGN International HQ: USA: Lalliana Mualchin (Email: mualchin@hotmail.com)

News Compiler: Ngeni Mualchin (Email: mualchin@hotmail.com)

Editor: Patricia Macy (Email: mailto:pamacy@netzero.net)